الكورة مع ماهر .. الأهلي في المونديال

رغم الخسارة من ريال مدريد وفلامنجو بنتائج كبيرة لكن نقدر نعتبر مشاركة الأهلي في مونديال الأندية تجربة جيدة على مستوى الأداء بدرجة لا بأس بها….. طموحات الجمهور كانت كبيرة جدا خصوصا بعد أول مبارتين ضد أوكلاند وسياتل لكن على أرض الواقع نقدر نقول إن صعب جدا منافسة فرق بحجم بطل أوروبا وبطل أمريكا الجنوبية إلا لو كان الفريق مركز جدا وموفق جدا وأخطاؤه قليلة جدا… الأخطاء دي اللي هي بتمثل جزء كبير من لعبة كرة القدم والأخطاء دي اللي بتخلي فريق زي ريال مدريد يخسر على أرضه من برشلونة 4-0 السنة اللي فاتت وخلت برشلونة نفسه يخسر من ليڤربول 4-0 وخليت ليڤربول بجبروته يخسر من الريال في نهائي الشامبيونز 3-1.

 رينيه ڤايلر مدرب الاهلي اتسال في مرة عن الأهلي لو بيلعب في الدوري الالماني هيكون تقييمه إيه فرد إن ممكن ينهي الموسم في المراكز من 8 ل 12…. وده اللي ممكن نقول عليه إن عشان تنافس المستويات العالية لازم يكون عندك الإمكانيات المناسبة للمنافسة بمعنى يكون عندك ميزانية تخليك تستقدم محترفين على مستوى عال….. الهلال السعودي عنده 8 محترفين سعر الواحد فيهم ما بين 7 ل 8 مليون يورو طبعا ده مستحيل يحصل في الأهلي لإن الوضع الاقتصادي مختلف فالواقع بيقول إنك بتجيب محترفين ممكن يخلوك تتفوق محليا أو قاريا لكن مش أكثر من كده…. وعشان كده هنلاقي إن الأهلي في معظم المشاركات اللي بيكون طرفها نادي أوروبي أو من أمريكا الجنوبية ممكن يقدم أداء كويس لكن غالبا بيخسر.

مفيش شك إن أهم مركز الأهلي محتاج تدعيم قوي فيه هو مركز راس الحربة مش عشان شريف ضيع فرصة كان ممكن تكون سبب في إحراز الميدالية لإن بيدرو مهاجم فلامنجو اللي سعره 20 مليون يورو ضيع فرصه أخطر منها في الشوط الأول وهو على بعد نص متر من المرمى ولعبها فوق العارضة بس احنا متأكدين إن معدل التسجيل بتاعه أكتر من شريف بكتير حتى لو ضيع فرصة كبيرة…. مهاجمين الاهلي وكواليتي المحترفين اللي عندنا يخلوا الاهلي يتفوق إن شاء الله في أفريقيا لكن مع الريال وفلامنجو وغيرهم الموضوع مختلف يا ريت كفايه تقطيع في اللعيبة اللي غلطت زي شريف والشناوي وديانج وقفشة لان  محدش نفسه يغلط والكل كان عايز يعمل حاجه وما ننساش إن اللعيبة دي مكمله لآخر الموسم ومصلحة الفرقة وهي داخلة على دوري الأبطال وبقية الدوري أهم بكثير من السف والتريقة اللي مش هيقدم لكنه هيأخر كتير..

الأهلي كسب من البطولة ماديا وكسب تجارب وخبرات واحتكاك هيفيدنا في المستقبل جدا والأهم من كده رسخنا وأكدنا إن الإصرار والعزيمة والروح دي سمات متأصلة في شخصية الفريق وبتتوارثها الأجيال.