كيف تعلـم أنك مُصاب بالأكتئــاب ..؟

بقلم د : غادة محفوظ

ما هي حالة الأكتئاب ..؟ لن أحـاول أن أشرح معني الأكتئاب بمصطلحـات علمية معقدة كما يفعل الأطباء النفسيون مع مرضاهم .. فيزيدون من حدة أكتئابهم .. بل بمفاهيـم بسيطـة يفهمهــا ويستطيـع تشخيصهــا أي أنسان عادي .. حتي يستطيع علاج نفسه بنفسه ودور المحيطين به في مساعدته علي الشفاء .. لابد أن نعلم الحقائق التالية :-

– الاكتئاب بيخنق روحك ويصيبك بالعمي عن الحياة .. بتقع في بير ضلمة لوحدك، سامع الناس بس مش شايفها .. ولكنه فى النهاية مرض زى أى مرض حسب أحدث النظريات العلمية بيكون بسبب خلل في كيمياء المخ .
– الاكتئاب ملوش علاقة بالدين والناس اول شيء بتتهم المكتئب .. أنه بعيد عن ربنا ولو صلي أكترهيخف .. الناس ديه كلامها مؤذي نفسيا جدا لأنه بيزود احساسه بتأنيب الضميراللى بيبقى عالى فى الاساس وممكن يبعده أكترعن العبادة .. خصوصا مع شلل الارادة اللى بيصاحب الاكتئاب واللى بيمنعه من القيام حتى بواجباته اليومية، اذن لهزيمته محتاج علاج فعلي وقوة ارادة، مثال ” عمرك رحت المستشفي وعندك الزايدة منفجرة فالدكتور قالك:- أنت علشان مطلعتش زكاة السنة دي فالزايدة انفجرت !
– فى فرق كبير بين الاكتئاب اللى هو فعلا مرض .. وبين الحزن اللى هو حالة تصيب البشر نتيجة حدث مؤلم وبين الطاقة السلبية اللى كلنا بنتعرضلها فى محيطنا كل يوم، أذن ماتبقاش موهوم بعد قراءة المقال أنك مكتئب لأن كلنا مضغوطين وأحيانا حزانى جدا لكن مفيش مرض مسيطر على دماغك بيدفعك للانتحار، الناس اللى بتصحى من النوم تقول أنا مكتئبة النهاره دى بتدلع لأن ببساطة المكتئبين مابيقدروش يشتكوا.

– الاكتئاب بيخليك أحيانا بتفكر تنهى حياتك، جزء من أعراض المرض أنك تبقي عايز تخلص من الوجع وحاسس مفيش أمل فى بكرة .. والأمل هوا اللى بيخلى الناس عايشة ومستحملة، فقدان الامل بيخليك حاسس أن محدش هيقدر يساعدك ولا يطلعك من اللى أنت فيه، بيحسسك أن كل الطرق اتسدت وكل ده مش حقيقى ربنا رحمته وسعت كل شىء وفى خلال شهور بيبقى حال الانسان اتبدل وأبواب جديدة اتفتحت فى وشه، ربنا كريم بعد كل عسر يكافىء الانسان بيسرشديد.
– الناس اللي بيتعاملوا مع مريض اكتئاب لازم يبطلوا يتعاملوا معاه بكلام زي .. انزل اتمشي شوية – قوم فرفش واتفرج على مسرحية حلوة – قرب من ربنا – سافر الهند – قصي شعرك واقرى كتاب مفيد – أنت محسود – انت معمولك عمل .. ألخ…
اتهدوا كفاية عذاب المرض نفسه مش لازم سخافتكم فوقها، دي مش مساعدة دي مناهدة.

– فى فنانين كتيرمرضي اكتئاب لأن العملية الابداعية مرتبطة بالمشاعرولأنهم كائنات حساسة بزيادة وعندهم أبعاد وخيال وحياة كاملة جوا دماغهم، روحهم مدينة جواها ألوان ماتخطرش علي بالك، الرسامين والأدباء والشعراء والروائيين، الناس اللي عندها أفكار بتتولد في دماغها عندها أوجاع كمان جواها.
– الاكتئاب مرض نفسي .. بيولد عرض جسدي .. وبيختلف من واحد للتانى مثل الصداع المزمن، التهاب الاعصاب، أمراض المعدة وطبعا ” البانك اتاك – Panic Attack ” اللعينة أو ما يسمي بــ” نوبات الهلع” .. لما تحس أنك خايف وقلبك بيدق بشدة ومش عارف تتنفس دي نازلة مع كتالوج المرض لا مفر منها .. الجسم بيدبل مع الروح ! .. غير لخبطة الأكل والنوم وتشتت التركيز.
– مرضي الاكتئاب زي مرضي السكر، لازم ما ياخدوش طاقة سلبية زيادة ولا صدمات .. ولا نفسيتهم يهلكوها زي مريض السكر اللي صينية بسبوسة تقضي عليه.

اللي بيخف من الاكتئاب بيبقي عايش بالملاحظة ومتعايش مع مرضه، عارف الاعراض والعلاج، لازم ياخد باله أنه عرضه للمرض فى أى وقت زى مريض الحساسية.
– مرضي الاكتئاب أكترناس فرفوشة بيقدروا قيمة النورلأنهم عاشوا في البيرالضلمة كتير، بيترنحوا بشدة في المود من أقصي اليمين لأقصي الشمال، من الرقص في حفلة والضحك لبانك اتاك فجأة.
– نصائح ممارسة الرياضة والجنس وأكل الشيكولاته والكيوي كل ده فشنك .. كلها مسكنات موضعية بتزود هرمونات السعادة بطريقة مؤقتة .. لأن الاكتئاب بيخليك ما تحسش بطعم الدنيا، اللى بيفرحك مبقاش فارق معاك، بتزق في حيطة علشان تروح الجيم وبتشعر بالملل من أول لمســة .. ولوأكلت محل شيكولاته في مشكلة قائمة وصدمة مش هتعرف الشيكولاته تلحــم أو تلزق قلبك المكسور، المرض بيخلى الواحد لا عنده نِفس ولا نَفس يعمل حاجة.
– مصروالدنيا كلها ماشية علي أدوية اكتئاب، هى عكاز من مرحلة لمرحلة لكن لو ماساعدتش نفسك مش هتخرج ومش هتبطلها.

في ثلاثة أنواع من الدكاترة النفسيين :-

– دكتورينظرعليك .. ما حياتك كويسة وفى ناس تتمني نصها.
– دكتوريهريك أدوية من غير ما يسمعك ولا أنت محتاجاها.
– دكتورمحترم بيسمعك ويساعدك ويوجه تفكيرك ولو حالتك محتاجة أدوية بيكتبلك جرعة صح و يساعدك بخطة للعلاج النفسي بجانب الدوائي.
– الحاجتين اللي فعليا بيعالجوا الاكتئاب “الشغل والحب” ..
اشتغل كل حاجة وأى حاجة وتفاصيل كتير وحاجات بتحبها وأعمال خيرية، اعمل عملية احلال للتفاصيل السلبية الحزينة فى عقلك بأخرى ايجابية ومسببة للنجاح.
حاوط نفسك بناس بتحبها، الحضن هو الدوا الحقيقي للاكتئاب، حضن ناس فعلا بتحبك وبتحبها، العلاقات الانسانية الصادقة هى اللزق الحقيقي اللي بيجمع الروح المفلوقة نصين.

– الصلاة والايمان مهمين في الصحة والمرض، قربك من ربنا هيديك عزيمة تكمل الحياة .. ” لكن لوحده يبقي تواكل مش توكل ” ، يعني تصلي وتنزل تشتغل .. موش ترجع سريرك تنام وتأنتــخ .. تدعي ربنا وتقوله أنا بعمل مجهود ووبستشير دكتور وبنزل اشتغل وبتعالج .. أنا مش يائس من رحمتك يالله .. أنا بس ضعيف ومكسور .. أجبر قلبي فأنت الكريم الجبار، كلنا ملناش غير ربنا وبس.
وأخيــراً .. أحب أقول أن رغم صعوبة الامراض النفسية .. إلا أنها بتقربك أكتر من انسانيتك ومن روحك.. فكلنا مرضي بطرق مختلفة ودرجات مختلفة .. كلنا بشر !
يارب أكون شاركــت بشي مفيــد ..