ماتصدقوناش

بقلم د : جمال الشاعر

ماتصدقوناش

إن قلنا إن العيشة على أيامنا

كانت ببلاش

ماتصدقوناش

فى حكاية كباية الشاى العصرية

والست اللى بتغنى بآهه وحنية

وحلاوة اللمة حوالين الطبلية

والنومة تحت الشبابيك المكسية

بستاير شاش

ماتصدقوناش إذا قلنا كانت

أسعد أوقات تتعاش

لو مصمصمنا الشفة وقلنا بخفة

شفنا العزة

وغيرنا اتذل ومالحقهاش

ماتصدقوناش

وماتسألوناش

إزاى إتكعبلنا وأصبحنا

ضحايا وإتحكم فينا شوية أوباش؟

هل كنا بجد الجيل الخواف؟

فعلا كنا

وماكناش

كلمة لأ إتلئت جوه ف زورنا

فماقلناش

مايذل البنى آدم إلا عياله

لو قالوا المم ومالتقيناش

متشعلق فى حبالنا الدايبة

أفواه وأنارب

وإن قصرنا شوية مابيرحموناش

لو كنا صحيح مانعجبكوش

طب ماإنتوا كمان مابتعجبوناش

واحدة بواحدة

شايفنكوا الجيل التراللى

إتمردتوا علينا

وإتمألستوا فى كام مليون تغريدة

وإستبعدتونا من أى نقاش

على بابا ياواد إنته

وهوه وهيه

وهمه بتتلاوعوا ؟!

مع إنه برغم الخيبة الويبة

معاكو ماتلاوعناش ؟!

حسك عينك

تتشقلب فى كلامك

زى الكلامنجى القلاش

إحنا بتوع الأوتوبيس

والقطر الميرى القشاش

وإحنا اللى إتسروقنا فى لوحة

زهر الخشخاش

وإحنا اللى إتنشلت منا ف عز الضهر

الأوناش

ماحناش عصافير

ولا داقين عصافير

ولا ف ايدينا الحنة و لا جناحات بتطير

ولا لابسين الطراطير

ولا كنا حمير

كنا بنلف مع الدنيا

وبنزرع نقلع ف الطين

راضين

وعينيا عليكو بتقول ليكو

بصوا لقدام

.. ماتقلدوناش

إحنا الجيل اللى بيقول

.. الأبلة ..

وأبيه ..

والهانم .. والبيه

ونقزقز لب ونلعب

نحلة ومساكة

وأما بنكبر نلعب كروكيه

بنقلد ميكى وعلاء الدين

وثلاثى أضواء المسرح ونغنى

مج ممجمج مج ممج مجانين

.. لكن عايشين

مش عارفين الشفرة وبنغنى

علشان الدنيا ماتعقدناش

إحنا الجيل اللى إتغش

ف ورق الكوتشينة

وإتحبست أحلامه

ف جزمة جديدة وعيدية

بنحوشها مانصرفهاش

ماتكذبوناش إن قلنا

وقفنا وقفة رجالة

بس تعبنا وإتعذبنا

ثم قعدنا ع القرافيص

فى طابور العيش الحاف

بنغمس ملح بدقة

ولا نتشكاش

مرات إتنرفزنا وإتزربنا

بس بينزل كل كلامنا ف الآخر

على هبد ورزع ومزع

يهَدُونا أحيانا ثم يلمونا

يحطونا ف خانة اليك

يجربوا فينا نظريات العك

إستنجدنا وقلنا يامين

عملوا ودانهم طين وعجين

حتى صلاح الدين الطفشان

لساته ماجاش

إحنا الجيل الآمر والمأمور

ساكنين ف الدور المسحور

وأسانسير الحظ

يعدى علينا

مايستناش

حط معايا القطن

وحط الشاش

على حزنى وحزنك

على إحباطى

وعلى إحباطك

من أيام البكباش

التصليح ياصلاح

مش غرفة إنعاش

يدخلها مريض السكر يتعكر

ومريض الضغط

يزط ف عيان الموراتزم

ويتحزم بالشلل الرعاش

إفتح جوجل

وإقرا معايا

إزاى البارونات المزاجنجية

إستهتروا بينا

ثم قالولنا طناش

عملولنا البحر طحينة

بتعوم فيها

كنوز البريمة

وقالولنا شفتوا البركات

ردينا طشاش

بيصبوها ف مصلحتك

أيوه إنما

مابيشرحوهاش

جيل بيعافر فى التكنو

والجيل التانى

معشش ف الأحراش

زى الخفاش

ماتأطموناش وتقولوا إن إحنا

هِرمنا خلاص

ماحناش عواجيز الزفة

ولسانا بخيرنا

وف غاية الإدهاش

كانت أحلامنا مكتوبة

على السبورة بشوية طباشير

وطموحنا متنتور

ف مجلة حيطة عبيطة

بنقراها لبعضينا ماننشرهاش

ياما إستقتلنا ومستقبلنا قتلنا

ماساعدناش

من ساعة أيام النكسة

وبنطلونات الشارلستون

وشعور الهيبى

وتتخيين الصوت زى الأجحاش

الجيل الشاب أهو شاب

وسواء إن كنت بلوجر

ولا فلوجر على بابنا

قفل مسوجر

وف عالم عوجر بيلخبط بين

السوبر مان والسايبرمان

إحنا من جيل السبيعينات

وإنتوا من جيل الألفينيات

بينا وبينكو فروق سرعات

ومسافات

لكن ممكن

نتصاحب

لو صفيت بينا النيات